अलिबाग, कोकणनामा वृत्त- रायगड जिल्हा माध्यमिक व उच्च माध्यमिक शाळा सेवानिवृत्त मुख्याध्यापक संघटनेची पाचवी वार्षिक सर्वसाधारण सभा पेझारी येथील संघटनेचे अध्यक्ष डॉ. श्रीकांत पाटील यांच्या निवासस्थानी त्यांच्या अध्यक्षतेखाली संपन्न झाली. सभेस जिल्ह्यातील अलिबाग, पेण, पनवेल, पाली-सुधागड, कर्जत, मुरुड, रोहा, महाड व पुणे येथून मुख्याध्यापक उपस्थित होते.
सभेच्या प्रारंभी अध्यक्ष श्रीकांत पिटील यांनी सर्व उपस्थित मुख्याध्यापकांचे स्वागत केले.सभेच्या कामकाजाला सुरुवात करण्यापूर्वी दिवंगत मुख्याध्यापिका स्व.भारती हळदवणेकर यांना व अन्य ज्ञात अज्ञातांना श्रद्धांजली वाहण्यात आली. ज्येष्ठ मार्गदर्शक सदस्य पत्रकार बळवंत वालेकर यांनी स्व. हळदवणेकर यांनी केलेले शैक्षणिक,सामाजिक, शैक्षणिक व सांस्कृतिक क्षेत्रातील कार्य विषद केले. नंतर संघटना सचिव अजय पाटील यांनी मागील सभेचे इतिवृत्त वाचून दाखविले.
सभेतील चर्चेत कार्याध्यक्ष अ.पा. म्हात्रे, उपाध्यक्ष एस.एम. पाटील, सल्लागार पी.डी. साठे, प्रशांत गायकवाड, अनंत चिनके, रमेश थळे, पी.बी. सावंत, म्हात्रे, संजीवनी जोशी, स्नेहा पाटील, मोहरे यांनी चर्चेत सहभाग नोंदविला. त्यास सर्वानुमते मंजुरी देण्यात आली. नंतर संघटनेचे खजिनदार पी.के. पाटील यांनी संस्थेचा जमाखर्च वाचून दाखविला त्यास सर्वानुमते मंजुरी देण्यात आली. यावेळी संघटनेची नोंदणी व ऑडिट बद्द्ल सखोल चर्चा झाली. जमाखर्चास सर्वानुमते मंजूरी देण्यात आली.
याच सभेत महाराष्ट्र राज्य सेवानिवृत्त मुख्याध्यापक संघटनेचे नियोजित पंढरपूर येथील ३० व ३१ ऑक्टोबर रोजीचे राज्यस्तरीय अधिवेशन अथवा स्नेहमेळावा यशस्वी करण्यासाठी रायगडातून मोठ्या संख्येने सेवानिवृत्त मुख्याध्यापकांनी उपस्थिती लावावी, असे आवाहन अध्यक्ष श्रीकांत पाटील व सचिव अजय पाटील यांनी केले. शेवटी सचिव अजय पाटील यांनी आयत्यावेळी कोणतेही विषय नसल्यामुळे अध्यक्षांच्या परवानगीने आभार मानून सभेची सांगता केली.
