अलिबाग, कोकणनामा वृत्त-सायबर गुन्हेगारीच्या विळख्यातून सर्वसामान्यांना वाचवण्यासाठी आणि डिजिटल फसवणुकीच्या मुळापर्यंत पोहोचण्यासाठी रायगड पोलिसांनी एक अत्यंत धडाकेबाज व यशस्वी कारवाई केली आहे. या कारवाईत सायबर गुन्हेगारीचे जाळे पसरवणाऱ्या तब्बल ६ जणांच्या टोळीला बेड्या ठोकण्यात आल्या असून, त्यांच्याकडून लाखांचा मुद्देमाल हस्तगत करण्यात आला आहे. ऑनलाइन आमिषांना भुलून स्वतःची बँक खाती आणि कागदपत्रे दुसऱ्यांच्या हाती सोपवणाऱ्या नागरिकांसाठी ही कारवाई एका मोठ्या धोक्याची घंटा ठरली आहे.
रायगड जिल्ह्याच्या पोलीस अधीक्षक आँचल दलाल आणि अपर पोलीस अधीक्षक अभिजीत शिवथरे यांच्या मार्गदर्शनाखाली हा संपूर्ण तपास अत्यंत कुशलतेने पार पडला. या धडक कारवाईत सायबर पोलीस स्टेशनचे पोलीस निरीक्षक पंकज घाटकर, सायबर पोलीस स्टेशनचे सहायक पोलीस निरीक्षक अमोल जाधव, सायबर पोलीस स्टेशनचे सहायक पोलीस उपनिरीक्षक अजय मोहिते, तसेच सायबर पोलीस स्टेशनचे पोलीस हवालदार राजीव झिंजुर्ट, सायबर पोलीस स्टेशनचे पोलीस हवालदार तुषार घरत, सायबर पोलीस स्टेशनच्या महिला पोलीस हवालदार सुचिता पाटील, सायबर पोलीस स्टेशनचे पोलीस हवालदार समीर पाटील, सायबर पोलीस स्टेशनचे पोलीस हवालदार राहुल पाटील, सायबर पोलीस स्टेशनचे पोलीस शिपाई श्रेयस गुरव आणि सायबर पोलीस स्टेशनचे पोलीस शिपाई रूपेश म्हात्रे यांनी अत्यंत महत्त्वाची भूमिका बजावली.
सध्याच्या काळात सायबर गुन्हेगारीच्या घटनांमध्ये वाढ झाली असून, गुन्हेगार संघटित टोळ्यांच्या माध्यमातून गुंतवणूक योजना, अर्धवेळ नोकरीची संधी, डिजिटल अटक आणि शेअर मार्केटसारख्या प्रलोभनांनी नागरिकांची फसवणूक करत आहेत. या फसवणुकीची रक्कम वेगवेगळ्या बँक खात्यांत जमा करून घेतली जाते. यासाठी गरजू व आर्थिक अडचणीत असलेल्या व्यक्तींच्या नावाने सेव्हिंग किंवा करंट खाती उघडून त्यांचे पासबुक, ए.टी.एम., चेकबुक व सिमकार्ड स्वतःकडे ठेवले जातात. या म्युल खात्यांचा वापर नंतर सायबर गुन्हेगारीचे काळे धन वळवण्यासाठी केला जातो.
सदर बँक खाती एनसीसीआरपी पोर्टलवर तपासली असता, प्रत्येक खात्यावर मोठ्या प्रमाणावर तक्रारी नोंदवलेल्या आढळल्या. म्युल बँक खातेधारकांनी आर्थिक लाभासाठी कमिशन घेऊन आपली खाती दुसऱ्यांना वापरण्यास दिल्याचे निष्पन्न झाले. त्यानंतर सायबर पोलीस स्टेशन येथे गुन्हा नोंदवण्यात आला. या प्रकरणी तपासादरम्यान सुरुवातीस मयूर म्हात्रे (रा. पेण, महाराष्ट्र) आणि त्यानंतर पवन कुमार चिलीमुंटा (रा. काकीनाडा, आंध्र प्रदेश) यांना ताब्यात घेण्यात आले. हे आरोपी विविध खातेदारांच्या नावावर अनेक म्युल बँक खाती उघडणे आणि बनावट पद्धतीने मिळवलेल्या सिमकार्डची व्यवस्था करण्याचे काम करत होते. ही खाती व सिमकार्ड महाराष्ट्रासह देशाच्या विविध भागांत कार्यरत असलेल्या मुख्य सूत्रधारांकडे पाठवली जात होती.
तपासाअंती पोलिसांनी आरोपींकडून रोख रक्कम ५७,००० रुपये, तब्बल ७२ एटीएम कार्ड, क्रिप्टोकरन्सी वॉलेट ऑपरेट करण्याचे १ डोनल, ७ गेमिंग कार्ड, आरोपींचे किया सोनेट हे चार चाकी वाहन, ५२ सिम कार्ड, १८ मोबाईल फोन, ३ लॅपटॉप, १ पेन ड्राईव्ह, ५ प्रिपेड कार्ड आणि ६ मेमरी कार्ड असा मोठा मुद्देमाल जप्त केला आहे.
या कारवाईत पोलिसांनी अटक केलेल्या आरोपींची नावे आणि त्यांची भूमिका समोर आली आहे. मयूर विलास म्हात्रे (वय २५, रा. उंबर्डेफाटा, पो. कोप्रोली, ता. पेण) हा लोकांना कमिशन देऊन त्यांच्या नावाने म्युल बँक खाती उघडणे, सिमकार्डची व्यवस्था करणे आणि ती कुरियरमार्फत पुणे व हैद्राबाद येथील मुख्य सूत्रधारांकडे पाठवत असे. पवन कुमार चिलीमुंटा (वय २३, रा. काकीनाडा, आंध्र प्रदेश) हा आरोपी क्रमांक १ कडून म्युल अकाउंट व सिमकार्ड घेऊन मुख्य सूत्रधारांना पोहोचवणे आणि फसवणुकीचे पैसे एटीएम वा इतर मार्गाने काढून स्वतःचा वाटा ठेवून पुढे पाठवण्याचे काम करत असे.
तसेच अभिषेक गुप्ता (वय १९, मूळ रा. सिव्हील लाईन, नरैनी रोड अतर्रा, जि. बांदा, उत्तर प्रदेश, सध्या रा. मॅनहेटन प्राईड वर्ल्ड सिटी, चरोली, पिंपरी चिंचवड, पुणे) हा देखील म्युल अकाउंट व सिमकार्ड मुख्य सूत्रधारांपर्यंत पोहोचवणे आणि फसवणुकीचे पैसे काढून वाटा ठेवून पुढे पाठवण्याचे काम करायचा. अमनकुमार गुप्ता (वय २२, मूळ रा. सिव्हील लाईन, नरैनी रोड अतर्रा, जि. बांदा, उत्तर प्रदेश, सध्या रा. मॅनहेटन प्राईड वर्ल्ड सिटी, चरोली, पिंपरी चिंचवड, पुणे) हा मुख्य सूत्रधार पुण्यातील वेगवेगळ्या पत्त्यांवर कुरियरमार्फत म्युल अकाउंट व सिमकार्ड मागवून, त्यावर जमा झालेले पैसे अवैध मार्गाने यु.एस.डी.टी. वॉलेटद्वारे परदेशात पाठवत असे.
याशिवाय, या रॅकेटमध्ये एका १६ वर्षे ७ महिने वयाच्या विधिसंघर्षित बालकाचाही (मूळ रा. सिव्हील लाईन, नरैनी रोड अतर्रा, जि. बांदा, उत्तर प्रदेश, सध्या रा. मॅनहेटन प्राईड वर्ल्ड सिटी, चरोली, पिंपरी चिंचवड, पुणे) सहभाग होता, जो यु.एस.डी.टी. वॉलेटमार्फत पैसे परदेशात पाठवण्याच्या कामात मदत करत होता. वंश जितेंद्रकुमार सिंह (वय २१, मूळ रा. प्लॉट नं. १०, न्यू आझाद नगर, महिंद्रा पॅलेस जवळ, श्याम नगर, कानपूर, उत्तर प्रदेश) हा देखील अंश गुप्ताच्या संपर्कात राहून टेलिग्रामवरील विविध धारकांकडून म्युल अकाउंट व सिमकार्ड कानपूर येथे कुरियरमार्फत मागवून, जमा झालेले पैसे यु.एस.डी.टी. वॉलेटमार्फत गेमिंग व गॅम्बलींग साईटद्वारे परदेशात पाठवत असे.
या गंभीर प्रकरणाच्या पार्श्वभूमीवर रायगड पोलीस दलातर्फे जनतेला अतिशय महत्त्वाचे आवाहन करण्यात आले आहे. पैशाच्या छोट्याशा प्रलोभनाला बळी पडून कोणत्याही व्यक्तीने आपले बँक खाते, वैयक्तिक कागदपत्रे, फोटो किंवा सिमकार्ड दुसऱ्या वा अनोळखी व्यक्तीस वापरण्यासाठी अथवा चालवण्यासाठी देऊ नये. भविष्यात सायबर फसवणूक झाल्याचे समोर आल्यास आणि त्यात एखाद्याचे कागदपत्र, बँक खाते किंवा सिमकार्ड वापरल्याचे निष्पन्न झाल्यास, त्या व्यक्तीला देखील पोलिसांच्या कठोर कारवाईला सामोरे जावे लागेल, असा सज्जड इशारा जनसंपर्क अधिकारी, पोलीस अधीक्षक कार्यालय, रायगड अलिबाग यांनी दिला आहे.
