पेण, कोकणनामा वृत्त- कोकण एज्युकेशन सोसायटीच्या माध्यमिक विद्यालय शिर्की (पेण, रायगड) येथे गुरुवार, दिनांक १ ऑक्टोबर २०२६ रोजी रोटरी क्लब ऑफ पनवेलच्या वतीने विद्यार्थ्यांसाठी विशेष शैक्षणिक साहित्य वाटप कार्यक्रम उत्साहात पार पडला. रोटरी क्लब ऑफ पनवेलचे प्रोजेक्ट डायरेक्टर अमर म्हात्रे, सुलोचना म्हात्रे आणि नयना कदम यांच्या प्रमुख उपस्थितीत झालेल्या या कार्यक्रमास शाळा व्यवस्थापन समितीचे अध्यक्ष राजाराम शिवराम गावंड, अमोल पाटील, तसेच विद्यालयाच्या मुख्याध्यापिका यशोदा संतान पाटील, शिक्षक, पालक आणि मोठ्या संख्येने विद्यार्थी उपस्थित होते.
कार्यक्रमाची सुरुवात अतिशय उत्साही वातावरणात झाली. शाळेच्या मुख्याध्यापिका यशोदा संतान पाटील यांनी उपस्थित सर्व मान्यवरांचे गुलाबपुष्प देऊन आदरपूर्वक स्वागत केले. यानंतर रोटरी क्लब ऑफ पनवेलच्या वतीने विद्यार्थ्यांच्या शैक्षणिक उन्नतीसाठी महत्त्वपूर्ण साहित्याचे वाटप करण्यात आले. यामध्ये इयत्ता १० वीच्या बोर्ड परीक्षेची तयारी करणाऱ्या विद्यार्थ्यांसाठी प्रत्येकी १५०० रुपये किमतीच्या एकूण २५ शैक्षणिक ॲप्सचे मोफत वाटप करण्यात आले. विशेष म्हणजे, इयत्ता १० वीच्या विद्यार्थ्यांना रोटरी क्लबतर्फे अमर म्हात्रे यांच्या माध्यमातून हे शैक्षणिक ॲप्स गेल्या तीन वर्षांपासून सातत्याने वाटप केले जात आहेत. या डिजिटल ॲपचा अभ्यासासाठी विद्यार्थ्यांना खूप मोठा फायदा होतो, आणि या माध्यमातून आपली शैक्षणिक प्रगती कशी होत आहे, याचा अनुभव विद्यार्थी स्वतः देतात.
यासोबतच, इयत्ता ८ वीच्या एन.एम.एम.एस. (NMMS) स्कॉलरशिप परीक्षेसाठी प्रविष्ट झालेल्या १९ विद्यार्थ्यांना प्रत्येकी १००० रुपये किमतीच्या ३ मार्गदर्शक पुस्तकांच्या संचाचे वाटप करण्यात आले. ही राष्ट्रीय आर्थिक दुर्बल घटक शिष्यवृत्ती परीक्षा यशस्वीरीत्या उत्तीर्ण होणाऱ्या पात्र विद्यार्थ्यांना माध्यमिक व उच्च माध्यमिक शिक्षणादरम्यान पुढील सलग चार वर्षे (९ वी, १० वी, ११ वी आणि १२ वी पर्यंत) दरमहा १,००० रुपये शिष्यवृत्ती नियमितपणे मिळते, असे यावेळी स्पष्ट करण्यात आले.
कार्यक्रमादरम्यान इयत्ता ८ वीची एन.एम.एम.एस. परीक्षा आणि इयत्ता १० वीची बोर्ड परीक्षा या अत्यंत महत्त्वाच्या विषयांवर अमर म्हात्रे यांनी विद्यार्थ्यांना मोलाचे व प्रेरणादायी मार्गदर्शन केले. रोटरी क्लब ऑफ पनवेलच्या वतीने राबविण्यात आलेला हा उपक्रम ग्रामीण भागातील विद्यार्थ्यांच्या प्रगतीसाठी अत्यंत उपयुक्त ठरत असून, शिर्की परिसरातील शैक्षणिक वर्तुळात या स्तुत्य उपक्रमाचे सर्वत्र जोरदार कौतुक होत आहे. कार्यक्रमाच्या शेवटी उपस्थितांचे आभार मानून या सोहळ्याची सांगता करण्यात आली.
