आयुष्मान भारत कार्ड निर्मितीचे १०० टक्के उद्दिष्ट केले पूर्ण
अलिबाग, कोकणनामा वृत्त- रायगड जिल्हा परिषदेच्या आरोग्य विभागाच्या वतीने नुकताच २०२६-२७ मध्ये आयुष्मान भारत कार्ड निर्मितीचे १०० टक्के उद्दिष्ट पूर्ण करणाऱ्या ५० आशा स्वयंसेविकांचा सन्मान राजिप उपाध्यक्ष तथा आरोग्य सभापती मधुकर पाटील यांच्या हस्ते प्रमाणपत्र देऊन करण्यात आला. त्याचप्रमाणे विविध पुरस्कारप्राप्त आरोग्य केंद्रांचाही सन्मान करण्यात आला.
यावेळी उपाध्यक्ष मधुकर पाटील यांनी मार्गदर्शन करताना, “आरोग्य विभागाने सातत्याने सतर्क राहून काम करावे. त्याचप्रमाणे प्रत्येक नागरिकापर्यंत आरोग्यसेवेचा लाभ पोहोचवण्यासाठी प्रयत्न करावा. जिल्ह्यात उत्कृष्ट कार्य करणाऱ्या डॉक्टरांचाही सन्मान केला जाईल,” असे सांगितले.
रायगड जिल्हा परिषद आरोग्य समितीची सभा नुकतीच उपाध्यक्ष तथा आरोग्य सभापती मधुकर पाटील यांच्या अध्यक्षतेखाली पार पडली. या सभेसाठी जि.प. सदस्य उषा ठोंबरे, सदस्य नेहा पारंगे, सदस्य शर्मिला बोडके, सदस्य ॲड. अविनाश ठाकूर, सदस्य दिशा जाधव, सदस्य मन्सूर ताज, खालापूर पंचायत समिती सभापती कृष्णा पारंगे, मुरुड पंचायत समिती सभापती निलेश घटवळ, जिल्हा आरोग्य अधिकारी डॉ. दयानंद सूर्यवंशी, सहायक आरोग्य अधिकारी डॉ. जयेश गोसावी यांच्यासह इतर अधिकारी, कर्मचारी, पुरस्कारप्राप्त आरोग्य केंद्रांचे प्रतिनिधी आणि आशा स्वयंसेविका उपस्थित होत्या.
या सभेत जिल्हा आरोग्य अधिकारी डॉ. दयानंद सूर्यवंशी यांनी ‘तिशीचा पल्ला.. तपासणी अन् सल्ला’ या अभियानाची सविस्तर माहिती दिली. तसेच, ‘श्रीगणेशा आरोग्याचा’ अभियानाबाबत आढावा घेण्यात आला. २०२६-२७ मध्ये आयुष्मान भारत कार्ड निर्मितीचे १०० टक्के उद्दिष्ट पूर्ण करणाऱ्या ५० आशा स्वयंसेविकांचा सन्मान राजिप उपाध्यक्ष तथा आरोग्य सभापती मधुकर पाटील यांच्या हस्ते प्रमाणपत्र देऊन करण्यात आला. यानंतर, रायगड जिल्हा परिषदेच्या आरोग्य विभागात आपल्या सेवाकाळात अत्यंत निष्ठा व प्रामाणिकपणे काम केल्याबद्दल तीन
सेवानिवृत्त कर्मचाऱ्यांचाही गौरव मान्यवरांच्या हस्ते करण्यात आला.
पुरस्कारप्राप्त आरोग्य केंद्रांचाही गौरव:
राष्ट्रीय गुणवत्ता आश्वासन मानांकनामध्ये प्राथमिक आरोग्य केंद्र चिखलीने राष्ट्रीय स्तरावर उत्कृष्ट कामगिरी केल्याबद्दल राज्यात प्रथम क्रमांक पटकावला. याशिवाय, उपकेंद्र खंडाळे (प्रा.आ. केंद्र पोयनाड) राष्ट्रीय स्तरावर उत्कृष्ट कामगिरी केल्याबद्दल, उपकेंद्र धामणी (प्रा.आ. केंद्र नेरे) राज्य स्तरावर उत्कृष्ट कामगिरी केल्याबद्दल आणि उपकेंद्र देवळी (प्रा.आ. केंद्र गोरेगाव) राज्य स्तरावर उत्कृष्ट कामगिरी केल्याबद्दल गौरविण्यात आले.
