अहिल्यानगर, कोकणनामा वृत्त- पाच दिवसांचा बँकिंग आठवडा लागू करावा, द्विपक्षीय करारातील तरतुदींची प्रामाणिकपणे अंमलबजावणी करावी आणि कामगिरीशी निगडित प्रोत्साहन भत्त्यातील भेदभाव दूर करावा, या मागण्यांसाठी देशभरातील बँक कर्मचारी शुक्रवारी संपावर गेले. हा लढा केवळ पाच दिवसांच्या आठवड्यासाठी नसून, द्विपक्षीय करार, सामूहिक सौदेबाजीचा अधिकार आणि कर्मचाऱ्यांच्या न्याय्य सेवाशर्तीसाठी असल्याचे महाराष्ट्र स्टेट बँक एम्प्लॉईज फेडरेशनचे अध्यक्ष धनंजय कुलकर्णी यांनी स्पष्ट केले.
बँक ऑफ महाराष्ट्र कर्मचारी संघटनेचे प्रकाश कोटा यांनी सांगितले की, पाच दिवसांचा आठवडा ही कर्मचाऱ्यांची अनेक वर्षांपासूनची मागणी आहे. २०१५ मधील करारानुसार दुसरा व चौथा शनिवार सुट्टीचा करण्यात आला. त्यानंतर उर्वरित शनिवारही सुट्टीचे करण्याबाबत सहमती होऊन प्रस्ताव केंद्र सरकारकडे पाठवण्यात आला. मात्र, मान्य झालेली बाब अद्याप प्रलंबित ठेवण्यात आल्याने कर्मचाऱ्यांमध्ये नाराजी आहे.
पाच दिवसांचा आठवडा लागू झाल्यास कामाचे तास कमी होतील, हा दावा चुकीचा असल्याचे संघटनांनी म्हटले आहे. सोमवार ते शुक्रवार दररोज सुमारे ४० मिनिटे अतिरिक्त कामकाज करून एकूण कामाचे तास कायम ठेवले जाणार आहेत.
बँकांमध्ये मनुष्यबळाची कमतरता असून, कर्मचाऱ्यांवरील कामाचा ताण वाढत आहे. ग्राहकसेवा सुधारण्यासाठी रिक्त पदांची भरती, प्रशिक्षित मनुष्यबळ आणि सक्षम डिजिटल व्यवस्था आवश्यक असल्याचे संघटनांचे म्हणणे आहे. तसेच कामगिरीवर आधारित प्रोत्साहन योजनेत सर्व स्तरांतील कर्मचाऱ्यांना न्याय्य लाभ मिळावा, अशी मागणी करण्यात आली आहे. दरम्यान, मागण्या मान्य न झाल्यास २८ ते ३० सप्टेंबरदरम्यान तीन दिवसांचा संप करण्यात येणार आहे.
