३० सप्टेंबरपर्यंत प्रक्रिया पूर्ण करण्याचे आवाहन; ई-केवायसी न केल्यास राशनचा लाभ बंद होण्याची शक्यता
अकोला, कोकणनामा वृत्त- राष्ट्रीय अन्नसुरक्षा योजनेंतर्गत शिधापत्रिकेवर धान्याचा लाभ घेणाऱ्या सर्व पात्र लाभार्थ्यांना ई-केवायसी करणे बंधनकारक करण्यात आले आहे. ज्या लाभार्थ्यांची अद्याप ई-केवायसी झालेली नाही, त्यांनी ३० सप्टेंबरपर्यंत आपल्या गावातील रास्त भाव दुकानात जाऊन ही प्रक्रिया पूर्ण करावी, असे आवाहन पुरवठा विभागाने केले आहे.
राष्ट्रीय अन्नसुरक्षा अधिनियमांतर्गत पात्र अंत्योदय आणि प्राधान्य कुटुंबातील लाभार्थ्यांना दरमहा रास्त भाव दुकानांमार्फत धान्याचे वितरण केले जाते. शिधापत्रिकेतील प्रत्येक लाभार्थ्याचे आधारकार्ड आरसीएमएस प्रणालीशी संलग्न करण्यात आले आहे. धान्याचा लाभ केवळ पात्र व्यक्तींनाच मिळावा आणि वितरणातील गैरप्रकारांना आळा बसावा, यासाठी ई-केवायसी प्रक्रिया राबविण्यात येत आहे. लाभार्थ्यांनी जवळच्या रास्त भाव दुकानात जाऊन आधार प्रमाणीकरणाद्वारे ई-केवायसी करून घेणे आवश्यक आहे. शिधापत्रिकेतील प्रत्येक सदस्याची ई-केवायसी पूर्ण होणे अपेक्षित आहे. ३० सप्टेंबरनंतरही ज्या लाभार्थ्यांची ई-केवायसी झालेली नसेल, त्यांना धान्याची आवश्यकता नसल्याचे गृहित धरून त्यांच्या शिधापत्रिकेवरील धान्याचा लाभ बंद केला जाऊ शकतो.
जिल्ह्यातील सर्व संबंधित नागरिकांनी मुदतीपूर्वी ई-केवायसी करून घ्यावी. तसेच यासंदर्भातील कोणत्याही अफवांवर विश्वास ठेवू नये, असे आवाहन पुरवठा विभागाने केले आहे.
